ಫಡ್ನವೀಸ್ ಸೇರಿ 99 ಅಭ್ಯರ್ಥಿಗಳಿಗೆ ಬಿಜೆಪಿ ಟಿಕೆಟ್: ಮೈತ್ರಿ ಸೂತ್ರ                                 ಅಂತಿಮಗೊಳ್ಳುವ ಮೊದಲೇ ಪಟ್ಟಿ ರಿಲೀಸ್

ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆ 2024:ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆಗೆ ಸಿದ್ಧತೆ ಬಿರುಸಿನಿಂದ ನಡೆಯುತ್ತಿದೆ. ಮಹಾ ವಿಕಾಸ್ ಅಘಾಡಿಯಲ್ಲಿ ಸೀಟು ಹಂಚಿಕೆ ವಿಚಾರದಲ್ಲಿ ಬಿಕ್ಕಟ್ಟು ತಲೆದೋರಿದೆ. ಇತ್ತ ಮಹಾಯುತಿ ಮೈತ್ರಿಕೂಟದಲ್ಲಿಯೂ ಸೀಟು ಹಂಚಿಕೆ ಸೂತ್ರ ಅಂತಿಮಗೊಂಡಿಲ್ಲ. ಆದರೆ ಅದಕ್ಕೂ ಮುನ್ನವೇ 99 ಸ್ಥಾನಗಳಿಗೆ ಬಿಜೆಪಿ ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿದೆ

• ಮಹಾರಾಷ್ಟ್ರ ಡಿಸಿಎಂ ದೇವೇಂದ್ರ ಫಡ್ನವಿಸ್‌, ರಾಜ್ಯಾಧ್ಯಕ್ಷ ಚಂದ್ರಶೇಖರ ಬಾವಂಕುಲೆಗೆ ಟಿಕೆಟ್
• ಭೋಕರ್‌ ಕ್ಷೇತ್ರದಿಂದ ಮಾಜಿ ಸಿಎಂ ಅಶೋಕ್‌ ಚೌಹಾಣ್‌ ಪುತ್ರಿ ಶ್ರೀಜಯ ಚೌಹಾಣ್‌ ಸ್ಪರ್ಧೆ
• ಬಿಜೆಪಿಯ 99 ಅಭ್ಯರ್ಥಿಗಳ ಪಟ್ಟಿಯಲ್ಲಿ 13 ಮಹಿಳಾ ಅಭ್ಯರ್ಥಿಗಳಿಗೆ ಸ್ಥಾನ

ಮುಂಬಯಿ/ಹೊಸದಿಲ್ಲಿ: ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆಗೆ ಬಿಜೆಪಿ ಮೊದಲ ಪಟ್ಟಿಯಲ್ಲಿ 99 ಅಭ್ಯರ್ಥಿಗಳ ಹೆಸರು ಪ್ರಕಟಿಸಿದೆ. ‘ಮಹಾಯುತಿ’ ಮೈತ್ರಿಕೂಟದ ನಡುವೆ ಸ್ಥಾನ ಹಂಚಿಕೆ ಸೂತ್ರ ಅಂತಿಮಗೊಳ್ಳುವ ಮೊದಲೇ ಅಭ್ಯರ್ಥಿಗಳ ಹೆಸರು ಘೋಷಣೆ ಮಾಡುವ ಮೂಲಕ ಅಚ್ಚರಿ ಮೂಡಿಸಿದೆ.

ಮೂಲಗಳ ಪ್ರಕಾರ 288 ಸದಸ್ಯ ಬಲದ ವಿಧಾನಸಭೆಯಲ್ಲಿ ಬಿಜೆಪಿ 155 ರಿಂದ 160ಕ್ಷೇತ್ರಗಳಿಗೆ ಸ್ಪರ್ಧಿಸುವ ಸಾಧ್ಯತೆಯಿದೆ. ಉಳಿದ ಕ್ಷೇತ್ರಗಳಿಗೆ ಶಿವಸೇನೆ (ಶಿಂಧೆ ಬಣ), ಎನ್‌ಸಿಪಿ (ಅಜಿತ್‌ ಬಣ) ಸ್ಪರ್ಧೆ ಮಾಡಲಿವೆ.

ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್‌ (ನಾಗಪುರ ನೈರುತ್ಯ), ಬಿಜೆಪಿ ರಾಜ್ಯಾಧ್ಯಕ್ಷ ಚಂದ್ರಕಾಂತ್‌ ಬಾವಂಕುಲೆ (ಕಮ್ತಿ), ಮಾಜಿ ಸಿಎಂ ಅಶೋಕ್‌ ಚೌಹಾಣ್‌ ಪುತ್ರಿ ಶ್ರೀಜಯ ಚೌಹಾಣ್‌ (ಭೋಕರ್‌), ಸಂಸದ ನಾರಾಯಣ್‌ ರಾಣೆ ಪುತ್ರ ನಿತೇಶ್‌ ರಾಣೆ (ಕಂಕಾವ್ಲಿ) ಮೊದಲ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.

Ganesh Chaturthi Songs 2024 : Devotional songs and here are the lyrics.

ವಿಧಾನಸಭೆ ಸ್ಪೀಕರ್‌ ರಾಹುಲ್‌ ನಾರ್ವೇಕರ್‌ (ಕೊಲಾಬಾ), ರಾಜ್ಯ ಬಿಜೆಪಿ ಮಾಜಿ ಅಧ್ಯಕ್ಷ ಚಂದ್ರಕಾಂತ್‌ ಪಾಟೀಲ್‌ (ಕೊತ್ರೂಡ್‌), ಮುಂಬಯಿ ನಗರ ಬಿಜೆಪಿ ಅಧ್ಯಕ್ಷ ಆಶಿಶ್‌ ಶೆಲಾರ್‌ (ವಂಡ್ರೆ ಪಶ್ಚಿಮ), ಶಿಂಧೆ ಸಂಪುಟದಲ್ಲಿ ಸಚಿವರಾಗಿರುವ ಗಿರೀಶ್‌ ಮಹಾಜನ್‌ (ಜಮ್ನೇರ್‌), ಸುಧೀರ್‌ ಮುಂಗಂಟಿವಾರ್‌ (ಬಲ್ಲಾರ್‌ಪುರ್‌) ಹೆಸರುಗಳನ್ನು ಬಿಜೆಪಿ ಪ್ರಕಟಿಸಿದೆ. ಬಿಜೆಪಿಯ 99 ಅಭ್ಯರ್ಥಿಗಳ ಪಟ್ಟಿಯಲ್ಲಿ 13 ಮಹಿಳಾ ಅಭ್ಯರ್ಥಿಗಳಿದ್ದಾರೆ

ಅನುರಾಧಾ ಚವಾಣ್ (ಫುಲುಂಬ್ರಿ), ಶಾಸಕ ಗಣಪತ್ ಗಾಯಕ್‌ವಾಡ್ ಅವರ ಪತ್ನಿ ಸುಲ್ಬಾ ಗಾಯಕ್‌ವಾಡ್ (ಕಲ್ಯಾಣ ಪೂರ್ವ), ರಾಹುಲ್ ಅವಾಡೆ (ಇಚಲಕಾರಂಜಿ), ಅಮೋಲ್ ಜವಾಲೆ (ರಾವೇರ್) ಮೊದಲ ಬಾರಿಗೆ ಸ್ಪರ್ಧಿಸುತ್ತಿರುವ ಅಭ್ಯರ್ಥಿಗಳಲ್ಲಿ ಸೇರಿದ್ದಾರೆ.

ಬಗೆಹರಿಯದ ಎಂವಿಎ ಬಿಕ್ಕಟ್ಟು

ಮತ್ತೊಂದೆಡೆ, ಮಹಾರಾಷ್ಟ್ರದಲ್ಲಿ’ಮಹಾವಿಕಾಸ್‌ ಅಘಾಡಿ’ ನಡುವೆ ಸ್ಥಾನ ಹಂಚಿಕೆ ಬಿಕ್ಕಟ್ಟು ಮುಂದುವರಿದಿದೆ. ಮುಖ್ಯವಾಗಿ ಕಾಂಗ್ರೆಸ್‌ ಹಾಗೂ ಉದ್ಧವ್‌ ಬಣದ ಶಿವಸೇನೆ ನಡುವೆ ಮುಂಬಯಿ, ವಿದರ್ಭ, ನಾಸಿಕ್‌ ವಲಯದಲ್ಲಿ ಬರುವ ಕ್ಷೇತ್ರಗಳ ಹಂಚಿಕೆ ತಲೆನೋವಾಗಿ ಪರಿಣಮಿಸಿದೆ.

ಸ್ಥಾನ ಹಂಚಿಕೆ ವಿಚಾರವಾಗಿ ಮುಂಬಯಿನಲ್ಲಿ ಶನಿವಾರ ತಡರಾತ್ರಿವರೆಗೂ ಉಭಯ ಪಕ್ಷಗಳ ಮುಖಂಡರ ನಡುವೆ ನಡೆದ ಸಭೆ ಒಮ್ಮತಕ್ಕೆ ಬರಲು ವಿಫಲವಾಗಿದೆ. ಸ್ಥಳೀಯ ಕಾಂಗ್ರೆಸ್‌ ನಾಯಕರ ಧೋರಣೆಗೆ ಆಕ್ಷೇಪಿಸಿರುವ ಉದ್ಧವ್‌ ಬಣ, ದಿಲ್ಲಿಯ ಕಾಂಗ್ರೆಸ್‌ ವರಿಷ್ಠರಿಗೆ ದೂರು ನೀಡಿದ್ದು, ಮೊಂಡುತನ ತೋರಿದರೆ ಮೈತ್ರಿ ಭವಿಷ್ಯ ಡೋಲಾಯಮಾನವಾಗಲಿದೆ ಎಂದು ಎಚ್ಚರಿಸಿದೆ.

ನಾಸಿಕ್‌ ಪಶ್ಚಿಮ ಕ್ಷೇತ್ರಕ್ಕೆ ಎರಡು ಪಕ್ಷಗಳು ಬಿಗಿ ಪಟ್ಟು ಹಿಡಿದಿವೆ. ಜತೆಗೆ ವಿದರ್ಭ, ಮುಂಬಯಿನಲ್ಲಿ ಬರುವ 12 ಕ್ಷೇತ್ರಗಳಿಗೆ ಉದ್ಧವ್‌ ಬಣ ಪಟ್ಟು ಹಿಡಿದಿದೆ. ಶಿವಸೇನೆ ಬೇಡಿಕೆ ತಿರಸ್ಕರಿಸಿರುವ ರಾಜ್ಯ ಕಾಂಗ್ರೆಸ್‌ ನಾಯಕರು ನಿಲುವಿನಿಂದ ಬಿಕ್ಕಟ್ಟು ಮತ್ತಷ್ಟು ಉಲ್ಬ್ಬಣಿಸಿದೆ.

ಬಿಜೆಪಿಗೆ ಅಭ್ಯರ್ಥಿಯೇ ಇಲ್ಲ ಜೆಎಂಎಂ ಸಂಸದ ವ್ಯಂಗ್ಯ

”ಜಾರ್ಖಂಡ್‌ ಮುಖ್ಯಮಂತ್ರಿ ಹೇಮಂತ್‌ ಸೊರೇನ್‌ ವಿರುದ್ಧ ಕಣಕ್ಕಿಳಿಸಲು ಬಿಜೆಪಿ ಬಳಿ ಅಭ್ಯರ್ಥಿಯೇ ಇಲ್ಲ,” ಎಂದು ಜೆಎಂಎಂ ಸಂಸದ ಮಹುವಾ ಮಾಝಿ ಟೀಕಿಸಿದ್ದಾರೆ. ”ಹೇಮಂತ್‌ ಸೊರೇನ್‌ ಸ್ಪರ್ಧೆ ಮಾಡಲಿರುವ ಬಹ್ರೈತ್‌ ಕ್ಷೇತ್ರಕ್ಕೆ ವಿಶ್ವದ ಅತಿದೊಡ್ಡ ಪಕ್ಷ ಎಂಬ ಖ್ಯಾತಿ ಪಡೆದಿರುವ ಬಿಜೆಪಿಗೆ ಸೂಕ್ತ ಅಭ್ಯರ್ಥಿ ಇಲ್ಲ. ಹೀಗಾಗಿ ಮೊದಲ ಪಟ್ಟಿಯಲ್ಲಿ ಹೆಸರು ಪ್ರಕಟಿಸಿಲ್ಲ,” ಎಂದು ಮಾಝಿ ಲೇವಡಿ ಮಾಡಿದ್ದಾರೆ.