Best Places to Visit During Christmas Holidays – ಕ್ರಿಸ್ ಮಸ್ ರಜೆ

Read this-Story of Jesus Christ: ಇದು ಜೀಸಸ್‌ ಜನ್ಮದ ಕಥೆ

ವಿಶ್ವದಾದ್ಯಂತ ಆಚರಿಸಲಾಗುವ ಹಬ್ಬ ಕ್ರಿಸ್‌ಮಸ್‌ಗೆ ಕೆಲವೇ ದಿನಗಳು ಬಾಕಿ. ಭಾರತದಲ್ಲಿಯೂ ಕ್ರಿಸ್‌ಮಸ್ ಅನ್ನು ವಿಶ್ವದ ಇತರ ದೇಶಗಳಂತೆ ಬಹಳ ಸಂಭ್ರಮದಿಂದ ಆಚರಿಸಲಾಗುತ್ತದೆ. ನಮ್ಮ ದೇಶದಲ್ಲಿ ಕ್ರಿಸ್‌ಮಸ್ ಅನ್ನು ಅದ್ದೂರಿಯಾಗಿ ಆಚರಿಸುವ ಕೆಲವು ಅತ್ಯುತ್ತಮ ಸ್ಥಳಗಳಿದ್ದು, ಈ ಬಾರಿ ಕ್ರಿಸ್ ಮಸ್ ರಜೆಯಲ್ಲಿ ಈ ತಾಣಗಳಿಗೊಮ್ಮೆ ಭೇಟಿ ಕೊಡಿ.

ಗೋವಾ

ಬಹುಶಃ ಭಾರತದಲ್ಲಿಯೇ ಕ್ರಿಸ್‌ಮಸ್ ಅನ್ನು ಸಡಗರದಿಂದ ಆಚರಿಸುವುದು ಗೋವಾದಲ್ಲಿ. ಇಲ್ಲಿ ಚರ್ಚುಗಳು ಮತ್ತು ಮನೆಗಳನ್ನು ಸುಂದರವಾದ ದೀಪಗಳು ಮತ್ತು ಪೊಯಿನ್‌ ಸೆಟಿಯಾ ಹೂವುಗಳಿಂದ ಅಲಂಕರಿಸಲಾಗುತ್ತದೆ. ಮಕ್ಕಳು ಕರೋಲ್ (ಭಜನೆ) ಗೀತೆಗಳನ್ನು ತಡರಾತ್ರಿ ಹಾಡುತ್ತಾರೆ. ಎಲ್ಲಾ ವಯಸ್ಸಿನ ಜನರು ಮಧ್ಯರಾತ್ರಿ ಸಾಮೂಹಿಕವಾಗಿ ಪಾಲ್ಗೊಂಡು ಚರ್ಚುಗಳಲ್ಲಿ ಸಾಲುಗಟ್ಟಿ ನಿಲ್ಲುತ್ತಾರೆ. ವಿಶೇಷವಾಗಿ ಈ ಸಮಯದಲ್ಲಿ ದೇಶದ ವಿವಿಧ ಭಾಗಗಳ ಮತ್ತು ವಿದೇಶದ ಸಾವಿರಾರು ಪ್ರವಾಸಿಗರನ್ನು ಗೋವಾ ತನ್ನ ಕಡಲತೀರಕ್ಕೆ ಕೈ ಬೀಸಿ ಕರೆಯುತ್ತದೆ. ಇಲ್ಲಿನ ಫೇಮಸ್ ಚರ್ಚ್‌ಗಳು: ಬೆಸಿಲಿಕಾ ಆಫ್ ಬೊಮ್ ಜೀಸಸ್, ಸೆ ಕ್ಯಾಥೆಡ್ರಲ್, ಸಾಂತಾ ಕ್ರೂಸ್ ಚರ್ಚ್

ಕೇರಳ

ಮೊದಲಿನಿಂದಲೂ ಗೋವಾ ಬಿಟ್ಟರೆ ಸಾಮಾನ್ಯವಾಗಿ ಕ್ರಿಸ್ ಮಸ್ ರಜೆಗೆಂದು ತೆರಳುವುದು ಕೇರಳಕ್ಕೆ. ಅಲ್ಲಿ ಅಸಂಖ್ಯಾತ ಚರ್ಚುಗಳಿದ್ದು, ಕ್ರಿಶ್ಚಿಯನ್ನರ ಸಂಖ್ಯೆಯು ಹೆಚ್ಚಿದೆ. ಕ್ರಿಸ್ ಮಸ್ ಸಮಯದಲ್ಲಿ ಜನರು ತಮ್ಮ ಮನೆಗಳು, ಚರ್ಚುಗಳು ಮತ್ತು ಬೀದಿಯನ್ನು ಅಲಂಕಾರಿಕ ದೀಪಗಳಿಂದ ಅಲಂಕರಿಸುತ್ತಾರೆ. ದೊಡ್ಡ ಮತ್ತು ಸಣ್ಣ ಚರ್ಚುಗಳು ರಾತ್ರಿಯಿಡೀ ತೆರೆದಿರುತ್ತವೆ. ಇಲ್ಲಿ ಸಾವಿರಾರು ಜನರು ಮಧ್ಯರಾತ್ರಿ ಸಾಮೂಹಿಕವಾಗಿ ಹಾಡುತ್ತಾರೆ. ಉತ್ಸವದಲ್ಲಿ ಪಾಲ್ಗೊಳ್ಳುವುದರ ಜೊತೆಗೆ ಕೇರಳದ ಹಿನ್ನೀರು, ಸುಂದರವಾದ ಕಡಲತೀರಗಳಿಗೆ ಭೇಟಿ ನೀಡುವುದು ಸಾಮಾನ್ಯವಾಗಿದೆ.ಇಲ್ಲಿನ ಫೇಮಸ್ ಚರ್ಚ್‌ಗಳು: ಬೆಸಿಲಿಕಾ ಆಫ್ ಅವರ್ ಲೇಡಿ ಆಫ್ ಡೊಲೊರೆಸ್ ಚರ್ಚ್‌ ಎಡತುವಾ ಚರ್ಚ್, ಸೇಂಟ್ ಫ್ರಾನ್ಸಿಸ್ ಚರ್ಚ್

Read this-Tale of the Smart Fox  ಬುದ್ಧಿವಂತ ನರಿಯ ಕಥೆ

ಮುಂಬೈ

ಮುಂಬೈ ಭಾರತದಲ್ಲಿ ಕ್ರಿಸ್‌ಮಸ್ ಆಚರಣೆಗೆ ಬಹಳ ಪ್ರಸಿದ್ಧವಾಗಿದೆ. ಬಾಂದ್ರಾ ಕ್ರಿಸ್‌ಮಸ್ ಸಮಯದಲ್ಲಿ ಮುಂಬೈನಲ್ಲಿ ನೋಡಬೇಕಾದ ಸ್ಥಳವಾಗಿದೆ. ಇಲ್ಲಿನ ಹಿಲ್ ರಸ್ತೆ ಕ್ರಿಸ್‌ಮಸ್ ಸಮಯದಲ್ಲಿ ಹೂವುಗಳು ಮತ್ತು ಬೆಳಕಿನಿಂದ ಅಲಂಕರಿಸಲ್ಪಟ್ಟಿರುತ್ತದೆ. ಹಿಲ್ ರಸ್ತೆಯ ಪಾದಚಾರಿ ಮಾರ್ಗದಲ್ಲಿ ಅಲಂಕರಿಸಿದ ಕ್ರಿಸ್‌ಮಸ್ ಟ್ರಿಗಳು ಸ್ಥಳೀಯರ ಹಬ್ಬದ ಉತ್ಸಾಹವನ್ನು ಎತ್ತಿ ತೋರಿಸುತ್ತವೆ. ನಗರದ ಚರ್ಚುಗಳು ಸಹ ಮಿರ ಮಿರ ಮಿನುಗುತ್ತಿರುತ್ತವೆ. ಎಲ್ಲಾ ಧಾರ್ಮಿಕ ಹಿನ್ನೆಲೆಯ ಜನರು ತಮ್ಮ ಸ್ನೇಹಿತರು ಮತ್ತು ಕುಟುಂಬದೊಂದಿಗೆ ಚರ್ಚ್‌ನಲ್ಲಿ ನಡೆಯುವ ಪ್ರಾರ್ಥನೆಯಲ್ಲಿ ಬಂದು ಪಾಲ್ಗೊಳ್ಳುವುದನ್ನು ಕಾಣಬಹುದು.ಇಲ್ಲಿನ ಫೇಮಸ್ ಚರ್ಚ್‌ಗಳು: ಬೆಸಿಲಿಕಾ ಆಫ್ ಅವರ್ ಲೇಡಿ ಆಫ್ ದಿ ಮೌಂಟ್, ಸೇಂಟ್ ಥಾಮಸ್ ಕ್ಯಾಥೆಡ್ರಲ್, ಅಫಘಾನ್ ಚರ್ಚ್

​ಬೆಂಗಳೂರು

ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಸುಂದರವಾದ ಹಲವಾರು ಚರ್ಚುಗಳಿವೆ. ವಿಶೇಷವಾಗಿ ಪಟ್ಟಣದ ಮಧ್ಯ ಭಾಗದಲ್ಲಿ. ಅವುಗಳಲ್ಲಿ ಅನೇಕ ಚರ್ಚುಗಳನ್ನು ಯುರೋಪಿಯನ್ನರು ನಿರ್ಮಿಸಿದ್ದು, ಭಾರತದ ಕ್ರಿಸ್‌ಮಸ್ ಆಚರಣೆ ಸಂದರ್ಭದಲ್ಲಿ ಬ್ರಿಟಿಷ್ ಅಥವಾ ಫ್ರೆಂಚರ ಪ್ರಭಾವವಿರುವುದು ತಿಳಿಯುತ್ತದೆ. ಬೆಂಗಳೂರಿನಲ್ಲಿ ಬ್ರಿಗೇಡ್ ರಸ್ತೆಯ ಸೇಂಟ್ ಪ್ಯಾಟ್ರಿಕ್ ಚರ್ಚ್ ಮತ್ತು ಹೊಸೂರಿನ ದಿ ಆಲ್ ಸೇಂಟ್ಸ್ ಚರ್ಚ್ ಪ್ರಮುಖವಾದವುಗಳು. ಈ ಸಮಯದಲ್ಲಿ ಪ್ಲಮ್ ಕೇಕ್, ಸ್ಮೈಲಿಗಳು, ಶುಂಠಿ ಚಹಾ ಭರ್ಜರಿಯಾಗಿ ಮಾರಾಟವಾಗುವುದನ್ನು ಕಾಣಬಹುದು. ರುಚಿಕರವಾದ ತಿನಿಸುಗಳನ್ನು ಸವಿಯಬೇಕೆನ್ನುವವರು ಎಂಜಿ ರಸ್ತೆಯ ಬಳಿ ಅಡ್ಡಾಡಿದರೆ ಸಾಕು. ಬೆಂಗಳೂರಿನಲ್ಲಿ ಕ್ರಿಸ್‌ಮಸ್ ಆಚರಣೆಯು ಒಂದೊಳ್ಳೆಯ ಅನುಭವ ನೀಡಲಿದ್ದು, ಲೈಫ್ ಟೈಮ್ ನೆನಪಿನಲ್ಲಿರುವಂತದ್ದಾಗಿದೆ.

Read this-Story of Guliga-ಗುಳಿಗನ ಕಥೆ

​ಮನಾಲಿ

ಪ್ರತಿವರ್ಷ ವಿಶೇಷವಾಗಿ ಕ್ರಿಸ್‌ಮಸ್ ಸಮಯದಲ್ಲಿ ಮನಾಲಿಯಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚುತ್ತದೆ. ಇದು ಚಳಿಗಾಲವಾದ್ದರಿಂದ ಈ ಸಮಯದಲ್ಲಿ ಬೀಳುವ ಭಾರೀ ಹಿಮವು ಇಡೀ ನಗರವೇ ಅಚ್ಚ ಬಿಳುಪಿನ ಮಂಜಿನ ಹೊದಿಕೆಯನ್ನು ಹೊದ್ದಂತೆ ಕಾಣುತ್ತದೆ. ಕ್ರಿಸ್ ಮಸ್ ಉತ್ಸವಕ್ಕೆ ಹೋಗುವವರಿಗೆ ಹೋಟೆಲ್‌ಗಳು ಮತ್ತು ರೆಸ್ಟೋರೆಂಟ್‌ಗಳ ಪ್ರವೇಶದ್ವಾರಗಳಲ್ಲಿ ಅದ್ದೂರಿಯಾಗಿ ಸ್ವಾಗತ ಕೋರಲಾಗುತ್ತದೆ. ಮನರಂಜನಾ ಕಾರ್ಯಕ್ರಮಗಳನ್ನು ಸಹ ಆಯೋಜಿಸಲಾಗುತ್ತದೆ. ಕರೋಲ್ ಸಂಗೀತ ಕೇಳುವವರಿಗಾಗಿ ವಿಶೇಷವಾದ ಸೌಲಭ್ಯವಿರುತ್ತದೆ. ಹೊರಗಿನ ದೀಪೋತ್ಸವದ ಬೆಳಕಿನಲ್ಲಿ ಜನರು ಹಾಡುತ್ತಾ ಕುಳಿತುಕೊಳ್ಳುತ್ತಾರೆ, ಆನಂದಿಸುತ್ತಾರೆ.ಇಲ್ಲಿನ ಫೇಮಸ್ ಚರ್ಚ್‌ಗಳು: ಗಿಲ್ಗಲ್ ಪ್ರೇಯರ್ ಹೌಸ್ ಚರ್ಚ್, ಆರ್ಕೋಟ್ ಲುಥೆರನ್ ಚರ್ಚ್

ಚೆನ್ನೈ

ದಕ್ಷಿಣ ಭಾರತದಲ್ಲಿ ಚೆನ್ನೈನಲ್ಲಿ ಕ್ರಿಸ್‌ಮಸ್ ಅನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಇಲ್ಲಿ ವೆಲಂಕನ್ನಿ ಚರ್ಚ್ ಸೇರಿದಂತೆ ಅನೇಕ ಪ್ರಮುಖ ಚರ್ಚುಗಳಿದ್ದು, ಕ್ರಿಸ್‌ಮಸ್ ನಲ್ಲಿ ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಸಂಜೆಯ ಸಮಯದಲ್ಲಿ ಕ್ಲಬ್‌, ಹೋಟೆಲ್‌ಗಳು ಮತ್ತು ಪಬ್‌ಗಳಲ್ಲಿ ಪಾರ್ಟಿಗಳನ್ನು ಆಯೋಜಿಸಲಾಗುತ್ತದೆ. ಸಣ್ಣ ಸಣ್ಣ ಗುಂಪುಗಳನ್ನು ಮಾಡಿಕೊಂಡು ಮನೆ ಮನೆಗಳಿಗೆ ಭೇಟಿ ನೀಡುತ್ತಾ ಕ್ರಿಸ್ತನ ಜನನವನ್ನು ಸಂಗೀತದ ಮೂಲಕ ತಿಳಿಸುತ್ತಾರೆ. ಹಾಗೆಯೇ ಸಾಂತಾಕ್ಲಾಸ್ ಉಡುಪನ್ನು ಧರಿಸಿರುವ ವ್ಯಕ್ತಿಯು ಗಿಫ್ಟ್‌ಗಳನ್ನು ಹಸ್ತಾಂತರಿಸುತ್ತಾನೆ. ನಗರದ ಗದ್ದಲದಿಂದ ದೂರ ಸರಿದು ಕಡಲತೀರವನ್ನು, ಸೊಗಸಾದ ಕ್ರಿಸ್‌ಮಸ್ ಪಾರ್ಟಿಗಳನ್ನು ಆಚರಿಸುವವರು ಚೆನ್ನೈಗೆ ಭೇಟಿ ನೀಡಿ.ಇಲ್ಲಿನ ಫೇಮಸ್ ಚರ್ಚ್‌ಗಳು: ಸೇಂಟ್ ಥಾಮಸ್ ಕ್ಯಾಥೆಡ್ರಲ್ ಬೆಸಿಲಿಕಾ, ಅರ್ಮೇನಿಯನ್ ಚರ್ಚ್, ಸೇಂಟ್ ಆಂಡ್ರ್ಯೂಸ್ ಚರ್ಚ್

Read this-The Tale of the Magic Stick  ಮ್ಯಾಜಿಕ್ ದಂಡದ ಕಥೆ

​ಸಿಕ್ಕಿಂ

ಸಿಕ್ಕಿಂ ರಾಜ್ಯದಲ್ಲಿ ಕ್ರಿಶ್ಚಿಯನ್ ಜನಸಂಖ್ಯೆ ತುಸು ಹೆಚ್ಚೇ ಇದೆ. ಸದಾ ಪ್ರವಾಸಿಗರಿಂದ ಕಿಕ್ಕಿರಿದು ತುಂಬಿರುವ ಸಿಕ್ಕಿಂನಲ್ಲಿ ಹಿಮದಿಂದ ಆವೃತವಾಗಿರುವ ಶಿಖರಗಳು ಕೈ ಬೀಸಿ ಕರೆಯುತ್ತವೆ. ಇದು ಚಳಿಗಾಲದಲ್ಲಿ ಭೇಟಿ ನೀಡಲೇಬೇಕಾದ ತಾಣಗಳಲ್ಲಿ ಒಂದು. ಯಾಕೆಂದರೆ ಡಿಸೆಂಬರ್ ಮತ್ತು ಜನವರಿಯಲ್ಲಿ ಹಿಮವನ್ನು ಆವರಿಸಿರುವ ಮುಸುಕಿನಡಿಯಲ್ಲಿರುತ್ತದೆ ಸಿಕ್ಕಿಂ. ಇನ್ನು ಕ್ರಿಸ್ ಮಸ್ ಸಮಯದಲ್ಲಿ ಪ್ರತಿಯೊಬ್ಬರ ಮನೆಯ ಮುಂದೆ ನಕ್ಷತ್ರ ಬುಟ್ಟಿಗಳು ತೂಗುತ್ತಿರುತ್ತವೆ. ಅಲಂಕೃತಗೊಂಡ ಮರಗಳು ದೀಪದ ಬೆಳಕಿನಲ್ಲಿ ಕಂಗೊಳಿಸುತ್ತಿರುತ್ತವೆ. ಅಡುಗೆ ಮನೆಯಿಂದ ಘಮಗುಟ್ಟುವ ಸ್ಪೈಸಿ ಚಿಕನ್ ಖಾದ್ಯಗಳು, ಕೇಕ್ ಗಳು ಬಾಯಲ್ಲಿ ನೀರು ತರಿಸುತ್ತವೆ. ರೆಸ್ಟೋರೆಂಟ್‌ಗಳು ಮತ್ತು ಪಬ್‌ಗಳು ತಡರಾತ್ರಿಯವರೆಗೆ ತೆರೆದಿರುತ್ತವೆ. ಮಧುಚಂದ್ರಕ್ಕೆ ಹೊರಟಿರುವವರು, ಕ್ರಿಸ್ ಮಸ್ ಹಬ್ಬ ಆಚರಿಸುವವರು ಕೂಡಲೇ ಸಿಕ್ಕಿಂಗೆ ಹೊರಡಲು ತಯಾರಾಗಿ. ಇಲ್ಲಿಗೆ ಭೇಟಿ ನೀಡಲು ಇದು ಅತ್ಯುತ್ತಮ ಸಮಯ.ಇಲ್ಲಿನ ಫೇಮಸ್ ಚರ್ಚ್ ಗಳು: ಹೋಪ್‌ ಸಿಟಿ ಚರ್ಚ್, ಸೇಂಟ್ ಥಾಮಸ್ ಚರ್ಚ್, ಬ್ಯಾಪ್ಟಿಸ್ಟ್ ಚರ್ಚ್ ಆಫ್ ಸಿಕ್ಕಿಂ

​ಕೋಲ್ಕತ್ತಾ

ಕೋಲ್ಕತ್ತಾ ಕ್ರಿಸ್‌ಮಸ್ ಸಮಯದಲ್ಲಿ ಭಾರತದಲ್ಲಿ ಭೇಟಿ ನೀಡಬೇಕಾದ ಅತ್ಯುತ್ತಮ ಸ್ಥಳಗಳಲ್ಲಿ ಒಂದಾಗಿದೆ. ಕೋಲ್ಕತ್ತಾಗೂ ಕ್ರಿಸ್‌ಮಸ್‌ಗೂ ಮೊದಲಿನಿಂದಲೂ ನಂಟಿದೆ. ನಗರದಲ್ಲಿ ಅನೇಕ ಆಂಗ್ಲೋ-ಇಂಡಿಯನ್ನರು ವಾಸವಾಗಿದ್ದು, ಇಲ್ಲಿ ಕ್ರಿಸ್‌ಮಸ್ ಸಮಯದಲ್ಲಿ ಚರ್ಚುಗಳನ್ನು, ಬೀದಿಗಳನ್ನು ಬಣ್ಣಬಣ್ಣದ ದೀಪಗಳಿಂದ ಅಲಂಕರಿಸಲಾಗುತ್ತದೆ. ಎಲ್ಲಾ ವಯಸ್ಸಿನ ಜನರು ಕ್ರಿಸ್ ಮಸ್‌ಗೆ ಶಾಪಿಂಗ್ ಮಾಡಲೆಂದೇ ಹೋಗುತ್ತಾರೆ. ಅನೇಕರಿಗೆ ಕ್ರಿಸ್‌ಮಸ್ ಎಂದರೆ ರುಚಿಕರವಾದ ಕೇಕ್ ನೆನಪಾಗುತ್ತದೆ. ಕೋಲ್ಕತ್ತಾದಲ್ಲೂ ಸಹ ಬೇಕರಿಗಳು ಗ್ರಾಹಕರಿಂದ ಕಿಕ್ಕಿರಿದು ತುಂಬಿರುತ್ತವೆ. ಲೈಟ್ ಸೌಂಡ್ ಪ್ರದರ್ಶನಗಳು, ರಾಕ್ ಬ್ಯಾಂಡ್ ಪ್ರದರ್ಶನಗಳು ಆಕರ್ಷಕವಾಗಿರುತ್ತದೆ.

ಕೋಲ್ಕತ್ತಾಗೆ ಕ್ರಿಸ್‌ಮಸ್ ಸಮಯದಲ್ಲಿ ಹೋದರೆ ಸುಂದರವಾಗಿ ಅಲಂಕಾರಗೊಂಡಿರುವ ಸೇಂಟ್ ಪಾಲ್ಸ್ ಕ್ಯಾಥೆಡ್ರಲ್, ಸೇಂಟ್ ಫಿಲೋಮಿನಾ ಕ್ಯಾಥೆಡ್ರಲ್, ಬೆಸಿಲಿಕಾ ಆಫ್ ಬೊಮ್ ಜೀಸಸ್ ಚರ್ಚ್ ನೋಡಿಕೊಂಡು ಬನ್ನಿ.